De Reuzekluut, de högste vastelaovesònderschejjing ien ut Piëlreuzeriek, wört dit jaor uutgereikt án niemus minder dan Nelly Ewals. De uutreiking viendt pláts òp zòndág 16 fibberwarie ien de Smelehof um 13:11 uur. Iederieën kriegt de gelaegenhejd um Nelly te fillesetiere. Wilde iets vurdrage, nim dan efkes kontakt òp mit Vorst Martijn Claessens, 06-14062643 of martijn@claessenstimmerwerken.nl
Nelly is en echte Piëlreuzin, gebore òp 24 augustus 1952 ien Ysselsteyn. Ien en gezin mit 7 kiender gräöjde zeej òp as derde ien de reej. De femilie Vergeldt haaj en gemengd agrarisch bedrief án de Moostdijk en eind jaore 60 verhuüsde zillie naor de Haedsepiël, nòw baeter bekend as de Zeilbergseweg waor en neej gemengd bedrief wier gestart. Nao de huushaldschól en de assistenteklas ging zeej thuus mitwaerke. Nao 7 jaor ging zeej ur aege pad en het zeej ien verschillende winkels gewaerkt. Ien 1976 is Nelly getrowd mit Jan Ewals, un jaor látter zien zeej án de Peter Janssenweg gaon woeëne. Hier krege zeej 2 kiender: Sjoerd en Anouk.
Ien ur tienerjaore het Nelly veul gesport en ok òp hoeëg niveau waoroonder mitgedaon án de Zeskamp ien Venray. Vanáf 1966, zeej was toen 14 jaor, wier zeej lid van de sportclub KPJ. Vur dizze tied was dit baeter bekend as Meisjes Beweging Limburg, afgekort MBL. Zeej wier al snel gevraogd of zeej sportleidster wooj wörre, hiervur het zeej en spesjiale cursus gevolgd beej de KPJ. Ieën van die oonderdieële welke zeej oonder ur hoede haaj was ritmische gymnastiek. Mit alle leidsters uut de regio ginge zeej elluk jaor en láng weekend weg um neeje technieke en oefeninge te lieëre. Dizze wiere dan wér toegepast beej de club. Ok deej zeej án atletiek. Tien jaor is zeej sportleidster gewist van dees club, en nie ònverdienstelek want veule bekers en medállies zien ien die tied gewonne. Daornaeve is zeej aenkele jaore aktief gewist as bestuurslid binne dees verieëneging.
Ien Venray wier Nelly gevraogd as instructrice van de majorettes beej DSV, baeter bekend as Drum en Show Band Venray. Um wat vur dees club te kunne betaekene is zeej en cursus gaon volge um de majorettes te kunne traine. Zoeë het zeej eind jaore 70 en begin jaore 80 de majorettegroep van 12 tot 18 jaor getraind en het dees begeleid tiejus traininge en wedstrieje. Ok het zeej ien die periode de dansmariekes uut Ysselsteyn les gegaeve. Mit dees ervaring het zeej ok aenkele jaore ien de zòmmerperiode gymles gegaeve án de aldere van Ysselsteyn.
De gedrevehejd van Nelly bleef nie onòpgemaerkt. Ien 1984 mogte der dur de bewoeëners van Ysselsteyn en stembiljet iengevuld wörre um ut bestuur van de dörpsraod te kieze. Nelly was ok kandidaat en wier gekoze dur ut dörp. Ut ware nie altied gemekkeleke diskussies die gevoerd mòsse werre. Verschillende jaore het Nelly lángs dees taak as bestuurslid ok de notule verzörgd. Acht jaor láng het zeej dees taak mit veul plezier gedaon.
Vruuger wierde al snel lid van de LVB, de Limburgse Vrouwen Beweging. Tiggeworreg baeter bekend as VrouwenKracht. Beej dees club het Nelly van 1991 tot 1999 ien ut bestuur gezaete en veule vurkòmmende waerkzaamhede verricht en ien diverse kemmissies gezaete. Veule jaore wiere van alle vergaderinge de notule tot ien de puntjes verzörgd dur Nelly.
Ien Ysselsteyn was dur gén kienderkoeërtje mér. De kapelaon wilde gér en kienderkoeërtje ien de kaerk. Nelly het dit òpneejd òpgezet. Umdat zeej aoverbliefkracht was òp de basisschól, was ut mekkelek um ien de klasse roond te gaon um te kieke of der jeugdige geïnteressierde ware. De interesse was groeët en zoeë was ut begin gemákt. Nelly is vanáf ut urste moment kartrekker gewist van dit kienderkoeërtje. Ien de urste jaore telde ut koeërtje wel 30 leeje en daormit was dit en groeët sukses. Natuurlek ware der ok uutdaginge en viel ut ien dizze tied nie mit um enne dirigent gevoonde te kriege. Toch krege zeej dit vur mekaer en kòs der mit veul plezier dur de kiender gezonge werre. Nelly sloeg gén aenkele repetisie aover, ut ware dan ok echt Nelly ur meide. Zeej het zich hier mit hárt en ziel vur iengezet same mit de moeders.
Vur de kaerk het zeej zich ok òp andere mojje meniere iengezet. Vanáf 2000 is Nelly lid van de aovendwake groep. Meense en moj en waerm áfschejd kunne gaeve van ur dierbare òp en persoeënleke menier is wat zeej mit liefde duut. Veuráf mit de naobestaonde gesprekke voere um persoeënleke wense kenbaar te make, ien de kaerk alles klaor zette en de aovendwake vurgaon. Aenkele waeke nao ut áfschejd beej de meense òp bezuuk gaon um nog en praotje te make. Dit vreejwillegerswaerk duut zeej nog steeds.
Nelly kwaam al regelmaotig ien de kaerk vur diverse waerkzaamhede. En logisch gevolg was dat zeej gevraogd wier vur ut kaerkbestuur. Van 2008 tot 2016 het zeej oonderdieël uut gemákt van ut kaerkbestuur. Ieën van de belangriekste take was ut kontakt mit de schól en de schólse aktiviteite regele ien de kaerk. De jaorlekse uutstepkes vur ut kienderkoeër en de misdienaars wiere geregeld, de zörg vur ut òpbowwe en áfbraeke van de kerststal, már ok ut afschejd en de ienstallasie van de laeste twieë pastoeërs zien mede geregeld dur Nelly.
Ien 2007 is ien Ysselsteyn de waek van de goej doele òpgericht. Vanuut ut kaerkbestuur het Nelly dizze taak òp zich genome vur de vastenaktie. Ur gehieële bestuursperiode beej de kaerk het zeej ien dizze waerkgroep dieëlgenome. Vurberejjende waerkzaamhede wiere gedaon, kollektes geregeld um uutaendelek vur de goej doele en moj bedrag òp te hale.
Ut zörge vur andere is Nelly òp ur buuk geschreve. Zoeë is zeej 12 jaor vreejwillegster gewist van de Zonnebloem, afdieëling Peelbloem Ysselsteyn, Merselo, Vredepeel. As vreejwillegster beej de Zonnebloem zette òw ien vur meense mit en bepaerking of die zich ieënzaam vuule. Nelly ging beejnao waekeleks òp bezuuk beej en alder echtpaar ien Ysselsteyn. En praotje, stukske wandele of en ritje naor ieën van de gezameleke aktiviteite van de Zonnebloem wier enorm gewaardierd dur dees meense.
En groeëte hobby van Nelly is ut zinge beej zanggroep Schone Schijn. Ien 2004 wier dees gezellige dameszanggroep òpgericht. Vanáf de òprichting is Nelly bestuurslid van dees club. Twieë jaor látter ien 2006 wier zeej gevraogd um vurzitster te wörre van dees zanggroep. Alle vurkòmmende waerkzaamhede wiere ángepakt en geregeld. Gezellighejd stöt beej de dames veuròp en ok Nelly het dit hoeëg ien ut vaandel staon. Tot òp hede is zeej nog steeds grötse vurzitster van dees groep en zeej doet dit mit veul aovergave.
Vanáf daág ieën as vurzitster van zanggroep Schone Schijn, het zeej ok pláts genome ien ut groeët bestuur van de Smelehof. Gemaenschápshuus De Smelehof is vur alle laeftieje en thuus vur tal van aktiviteite en en verscheidenhejd án verieënegingslaeve. En mojje mijlpaal was vurreg jaor ut 60 jäöreg bestaon van òs dörpshuus.
De Reuzekluut wört dit jaor uutgereikt án en vrow mit en mojje staot van verdienste vur de Ysselsteynse gemaenscháp en ok daorbuute. En vrow die zich beej diverse verieëneginge en kemmissies het iengezet um de gemaenscháp laefbaar te make en te behalde. As Nelly aerges vur göt, wörre ur talente en zörgzaamhejd iengezet. Ut durzettingsvermoge en same brenge van meense, het daorvur gezörgd dat veule verieëneginge en bloejend bestaon hebbe, waor ok de veule Ysselsteynse burgers van kunne geniete.
Nelly Ewals is en waerdig draegster van de Reuzekluut 2020, de högste vastelaovesònderschejjing ien ut Piëlreuzeriek.
Getaekend Bestuur Carnavalsverieëneging de Piëlreus
Vorst Martijn