Zoeë, ik zal mar wer us uut miene winterslaop komme. Ik heb veul te vertelle dizze kieër. De afgeloeëpe 3 waek zien nameluk veul activiteite gewest binne De Piëlreus!
Nao maonde lang oefene was ut dan eindeluk zo ver vur ozze aege rasartieste: de bonte aovenden zien begos! 4 fantastische aovenden waor elke aovend un uutverkochte zaal genoot van elke minuut. Van jong tot ald, ut makt niks uut, iederieën hed mit gedaon.
De jeugd liet zien dat zej ovver un antal jaor goeje opvolgers zien. Zoë hed de ganse raod laote zien dat Kel biet hond altied dur kan blieve gaon. Ok de meide van Jos Geurts en Janneke Jenneskens hebbe laote zien dat zej de rol van hun elders goed kunne ienvulle. Verder hed Koen van Soest, ok wel Barry Badpak, vur ut twedde jaor un prachtige buut nergezet.
Bej twieë aovende zien dur ok meense gehuldigd vur hun ienzet. Op jongere aovend kreeg René van de Pas un ieërbetoon namus De Piëlreus. Hej is bedankt vur zien ienzet vur 11 jaor bej ut Jeugdcomité. Op de latste bonte aovend is Luc Janssen ien ut zunneke gezet. Hej hed marliefst 11 kieër mit gedaon mit de bonte aovend! Ok hed hej veul op aandere maniere vur ozze carnavalsverieëneging zien haand uut gestoke. Hej hed dur onder aandere vur gezurgd dat wej elk jaor naor ozze liedjesaovend kunne gaon.
Tusse de bonte aovende is dur ok wer un jeugdbontemiddag gewest. De allerjongste jeugd van os dörp liet zien dat ok zej un prachtige middag kunnen verzörge. Dat beloofd wat vur de bonte aovenden ovver un antal jaor! Op ut end van de middag barstte ut fieëst los ien Venroj. Daor ware Stef en Tamara saame mit un ganse dillegatie ien Goesting um te kieke of dur ware naor de finale van ut LVK. En dat is ze ok nog gelukt!! 3 bussen uut ’t Piëlreuzenriek en nog un paar auto’s. Ut laefde ien Ysselsteyn! Nao de wat tiggevallende telling van verschillende juries, was de latste jury an de beurt: de publieksjury. En wat ware zej blie mit os Pruuf Mar! 13 punten!!
Afgeloeëpe waek was ut alwer tied vur Verkledbal. Un moj moment um ow fantesie de gang te laote gaon. Zeker mit ut thema van dees jaor: Laot ow lekker gaon. Clown bassie ging dur mit de pries van dur. Ien de zaal ware trouwes nie allieën Piëlreuze te viende. Ok un bus mit 80 spörriemuk uut Oeldere en un dillegatie van de Karklingels en ’t Knölleke. Al mit al un gezellige aovend mit un goed gevulde zaal.
De volgende merge was ut alwer tied vur de volgende activiteit: de Reuzekluut recepsie. Bert van Veghel is op dizze dag hieëlemol terecht ien ut zönneke gezet en ge kos um zien straole! Daornao was ut tied vur de volgende recepsie, die van Jubileumjeugdprins Lou. Dur verschillende groepe is hej same mit vorst Bas, de raod en de garde verrast mit verschillende cadeau’s en stukskes. Tiejes dat VVV zien 115 jaorig jubileumwedstrijd won van Feyenoord, was ozze Prins (en die-hard VVV-fan) ok ien de Jera anwezig. De DJ’s hebbe dur nog un moj fieëst van gemakt en daornao ging half Ysselsteyn aete bej de Jeugdprins. Nie normaal hoeveul Piëlreuze daor uutgenuudigd ware!
Now is ut alwer bejna tied vur de vastelaovend. De wages zien bejna klaor vur ut drejje ien de Rooyse optocht en de Reuze optocht. Dizze waek wörre de puntjes nog efkus op de i gezet en is ut tied vur de ienzaegening. Dat is altied un moj moment vur de wagebouwers, die flink wat tied, bloed, zwieët en traon ien de wages hebbe gestoke.
Ik bin ienmiddels goed uutgeslaope en klaor vur de vastelaovend! Ik hoop dat ik dat dit jaor wer mit zo veul Piëlreuze meug viere as aandere jaore! Tot mit de vastelaovend!!